Каррик кетиши мумкин, Уилкокс ва Беррада эса қолади

Буларнинг ҳеч бири ҳозирча расман тасдиқланмаган. Тҳе Телеграпҳ хабарига кўра, Каррикнинг истеъфоси яқин. Жамоа қуйи лигага тушиш зонасида турибди. Клуб эса бир календар йил ичида учинчи бош мураббийни тайинлашга ҳозирланмоқда. Каррик жамоани январда Рубен Аморимдан кейин қабул қилган, аввалига вақтинчалик мураббий сифатида ишлаган эди. Агар кетса, унинг фаолияти тахминан ўн ой давом этган бўлади.

Бундай ҳолат илк бор кузатилади: Манчестер Юнайтед 148 йиллик тарихида бир йил ичида икки мураббийни ишдан бўшатмаган.

Мухлислар норозилиги

Сўнгги ўйинларда трибуналардан Уилкокс, Ретклифф ва Глейзерлар оиласига қарата ҳақоратли қўшиқлар янгради. Мухлислар клубни бутунлай сотишни ва бошқарувда туб ўзгаришлар қилишни талаб қилмоқда.

Таранглик кийиниш хонасида ҳам сезилмоқда. Ўтган ой Атлетико Мадридга 0:2 ҳисобида ютқазилгандан сўнг ҳимоячи Лисандро Мартинес Уилкокс ва раҳбариятни ошкора танқид қилди. У трансфер сиёсати ва масъулиятдан қочишни айблаган эди. Футболчи жаримага тортилди ва оммавий тарзда узр сўради.

Ретклиффнинг танлови

Беррада ҳам, Уилкокс ҳам клуб ҳаммулкдори сер Жим Ретклиффнинг шахсий танлови. У 2024-йилда клубнинг кичик улушини сотиб олиб, футбол йўналишини ўз назоратига олган. Беррада Манчестер Ситидан келган. У ерда Уилкокс билан йўллари кесишган: Уилкокс ўша пайтда академияга раҳбарлик қиларди. Уилкокснинг ўзи 14 ой Саутгемптонда футбол директори бўлиб ишлаган, сўнгра Манчестер Юнайтедга техник директор сифатида ўтган. 2024-йил декабрида спорт директори Ден Эшворт кетгач, у футбол директори бўлди. Эшворт бу лавозимда бор-йўғи беш ой ишлаган эди.

Кейин нима: Монакодаги учрашув

Чоршанба куни Уилкокс ва Беррада Монакода Ретклифф билан учрашади. У ерда Инеос гуруҳи раҳбарларининг ярим йиллик саммити бўлиб ўтмоқда. Учрашув олдиндан белгиланган эди, бироқ энди у алоҳида аҳамият касб этмоқда: кун тартибида Каррикни ишдан бўшатиш эҳтимоли ва кейинги мураббийни танлаш масаласи турибди.

Эслатиб ўтамиз, Аморим ҳам клубдан Уилкокс билан очиқдан-очиқ тўқнашувдан кейин кетган эди. Бу тўқнашув Лидс Юнайтед билан 1:1 ҳисобидаги дурангдан сўнг бўлиб ўтган учрашувда юз берган. Ҳозир клуб мураббийни алмаштиришга тайёр, аммо директорларни эмас. Ҳолбуки мухлислар норозилиги айнан раҳбариятга қаратилган.