Кристал Пелас Сажни ишдан бўшатди, асосий номзод — Томас Франк

Сабр косасини тоширган охирги томчи якшанба куни Ливерпулдан 1:3 ҳисобида ютқазилган ўйин бўлди. Шундан кейин Кристал Пелас Премьер-лигада охирги ўринда қолди. Саж жамоани июн ойининг ўрталарида Оливер Гласнердан кейин қабул қилган ва уч йиллик шартнома имзолаган эди. Бу унинг Англиядаги илк иши эди.

Клуб Сажга ва у билан бирга кетаётган мураббийлар шитабига миннатдорлик билдирди. Янги бош мураббий тайинлангани ҳақида эса вақти келиб хабар беришини айтди.

Пер Саж кетганидан кейин Линкедин ижтимоий тармоғида ўзининг фикрини билдирди. У ишдан кетиш ҳолатлари ҳақида гапирмади, аммо мухлисларга, клуб ходимларига ва футболчиларга бирга ўтказган лаҳзалар учун миннатдорчилик билдирди. У клубга, жамоага ва қўллаб-қувватлаган барчага энг яхши тилакларни йўллаб, «Кристал Пелас»нинг ранглари «абадий ярқираб туради», деган сўзлар билан якунлади.

Нега ҳаммаси бунчалик тез барбод бўлди

Рақамлар қувонарли эмас. Чемпионатнинг 10 турида Кристал Пелас 7 очко тўглади: фақат Фулхем ва Ноттингем Форест устидан ғалаба, кетма-кет тўртта мағлубият ва 24 та ўтказиб юборилган гол — бу лигадаги энг ёмон кўрсаткич. Охирги саккиз учрашувда жамоа беш марта ютқазди, шу жумладан азалий рақиби Брайтонга 0:5 ҳисобида. Бу даврдаги ягона ғалаба Лига кубогида Фулхем устидан қўлга киритилди. Европа лигасининг умумий босқич жадвалида Кристал Пелас 36 жамоа орасида 21-ўринда турибди.

Тҳе Гуардиан маълумотига кўра, парда ортида ҳам муаммолар бор эди. Саж клуб сотилган марказий ҳимоячилар — Марк Гуэҳи (Манчестер Сити, январ) ва Максанс Лакруа (Челси, ёз) ўрнига муносиб алмаштирувчи топмаганидан норози эди. Фақат ижарага олинган Аксел Дисаси ва Онест Аҳанор келди, мураббийнинг асосий нишонларидан бири — қанот ҳужумчиси Малик Фофана эса жамоага қўшилмади. Шу манбага кўра, клуб президенти Стеве Париш Сажнинг ҳимоячи Жейди Канвога муносабатидан норози бўлган: у сентябрда Ипсвич билан ўйинда таркибга киритилмаган эди. Президентга ўша учрашувда Адам Уортоннинг алмаштирилиши ҳам ёқмаган.

Навбатдаги ким ва Саж қаерга кетади

Томас Франк февралдан бери ишсиз: ўшанда уни Тоттенҳем ишдан бўшатган эди. Ундан олдин у Брентфордда муваффақиятли ишлаган. Ёзда у Кристал Пелас билан гаплашган ва Тҳе Гуардиан маълумотига кўра, янги синовни истайди. Клубда у 21-ноябр, шанба куни Ковентри меҳмонида бўладиган ўйингача (Тошкент вақти билан 20:00) жамоани қабул қилади, деб умид қилишмоқда. Расман ҳали ҳеч нарса тасдиқланмаган. Захира вариантлар орасида Шон Дайч ва Витор Перейра бор — иккаласи ҳам илгари Ноттингем Форестни бошқарган.

Сажнинг ўзи қайтадиган жойи бор. Ланс сешанба куни Янникк Каҳузакни ишдан бўшатди ва 47 ёшли франсуз мутахассис бу лавозимга асосий номзод ҳисобланмоқда. Тҳе Гуардиан ёзишича, Ланс эгаси ва президенти Жозеф Угурлян у билан яқин алоқани сақлаб келган. Франсия матбуотига кўра, музокаралар кетмоқда, аммо тўлиқ келишувга ҳали эришилмаган: томонлар фақат маошни эмас, бошқа масалаларни ҳам муҳокама қиляпти. Саж Ланс билан Франсия кубогини ютган ва жамоани Чемпионлар лигасига олиб чиққан.

Кристал Пелас учун Сажнинг Франсияга қайтиши фойдали: клуб компенсацияда тежаб қолиши мумкин. Ёзда клуб мураббийни Ланс билан шартномасидан чиқариб олишга £4 миллиондан ортиқ сарфлаган эди. Франсия ОАВ маълумотларига кўра, Саж 18 ойлик маоши миқдорида тўлов олиб кетмоқда, келишув тафсилотлари бир неча кун муҳокама қилинган.