Ўзбекистон — Россия ўйинини Тожикистон ҳакамлари бошқаради

Ўзбекистон ва Россия терма жамоалари ўртасидаги ўртоқлик учрашувини бошқарадиган ҳакамлар маълум бўлди. Ўйин 12-ноябр куни Тошкентдаги «Пахтакор» стадионида бўлиб ўтади. Учрашув соат 20:00 да бошланади.

Бош ҳакам этиб Тожикистонлик FIFA ҳаками Гулмуроди Саъдулло тайинланди. Унга ён чизиқларда Ҳасан Каримов ва Фарҳод Куралов ёрдам беради. Демак, ҳакамлар бригадасининг барчаси бир давлатдан.

Терма жамоада кимлар бўлмайди

Фабио Каннаваро аввалроқ ноябр йиғинига чақирилган футболчилар рўйхатини эълон қилган эди. Шундан сўнг икки муҳим ўзгариш маълум бўлди.

Биринчиси — «Манчестер Сити» ҳимоячиси Абдуқодир Ҳусанов. У енгил жароҳат сабабли терма жамоанинг ноябр йиғинини ўтказиб юборади.

Иккинчиси — сардор Элдор Шомуродов. У оилавий сабабларга кўра Россияга қарши майдонга тушмайди. Бироқ 17-ноябр куни Доҳада Саудия Арабистони билан бўладиган ўйинда терма жамоа ихтиёрида бўлади.

Хуллас, Ўзбекистон Россияга қарши сардорсиз ўйнайди, Доҳадаги учрашувга эса Шомуродов қайтади. Каннаваро учун бу икки ўйинда турли таркиб вариантларини синаб кўриш имкониятидир.