Почеттино «Манчестер Юнайтед»да ишни 19-ноябрдан бошлайди

Кеча кечқурун «Америка» федерацияси билан келишувнинг асосий шартлари келишиб олинганини ёзган эдик. Энди жадвал ҳам аниқ бўлди. Клуб ва федерация шундай келишди: Почеттино терма жамоани Гаити билан иккала ўйинда бошқаради, сўнг Америкадаги фаолиятини якунлайди.

Йўл: Кингстон, Синсиннати, Манчестер

Гаити билан биринчи учрашув Британия вақти билан шанба кечқурун Ямайканинг Кингстон шаҳридаги «Сабина Парк» стадионида бўлади. Тошкент вақти билан бу 15-ноябрга ўтар тун, соат 02:30. Жума куни Гринвич вақти билан 14:15 да (Тошкент вақти билан 19:15 да) Почеттино «Атланта» яқинидаги АҚШ терма жамоасининг машғулот базасида матбуот билан учрашади.

Жавоб ўйини Синсиннатида ўтади ва Британия вақти билан чоршанба куни тунги соат иккилар атрофида тугайди. Ундан сўнг Почеттино Манчестерга учади. Нашрнинг ҳисоб-китобига кўра, у шу куниёқ етиб келади, Каррингтонда эса 19-ноябр, пайшанба куни ишга киришади.

Ливерпулгача уч кун

Аргентиналик мутахассиснинг тайёргарлик учун деярли вақти йўқ. «Манчестер Юнайтед» бошидаги илк ўйинигача футболчилар билан атиги уч кун ишлайди. 22-ноябр куни жамоа Премьер-лигада «Энфилд»да «Ливерпул»га қарши майдонга тушади. Ўйин Тошкент вақти билан 21:30 да бошланади.

Нашр маълумотига кўра, шартноманинг шахсий шартлари клуб билан аллақачон келишилган, АҚШ федерацияси билан эса умумий келишувга эришилган. Почеттинонинг америкаликлар билан шартномасида 10 миллион долларлик (тахминан 7,4 миллион фунт стерлинг) банд бор. Бундан ташқари, у Олд «Траффорд»га бир нечта эски ёрдамчисини ҳам олиб бориши кутилмоқда.

Бу кундузи берган саволимизга ҳам жавоб бўлади: Майкл Каррик кетгач машғулотларни ким ўтказади? Почеттино келгунга қадар бу масаланинг ечими ҳозирча клубга бағлиқ. «Манчестер Юнайтед» ҳам, «Америка» федерацияси ҳам ҳали расмий баёнот бермади.