Каррик «Манчестер Юнайтед» мухлислари билан хайрлашди

Эрталаб Фабрисио Романонинг Почеттино бош мураббий этиб тайинлангани ҳақидаги хабарини ёзган эдик. Энди мураббий алмашуви тасдиқланди, Каррикнинг ўзи ҳам кетаётганини айтди. 45 ёшли мутахассис клуб билан аразсиз хайрлашмоқда, мактубида у ҳақда фақат илиқ гапиради.

Каррик «Манчестер Юнайтед»да ишлашни улкан шараф ва худди шундай улкан масъулият деб атайди. Унинг сўзларига кўра, бу клубда майдонда бор кучни беришнинг ўзи етмайди. Ўнлаб йиллар давомида шаклланган маданият, қадриятлар ва ўзини тутиш услубини қабул қилиш керак. Айнан шу уни ҳар куни руҳлантирганини ёзади.

Мухлислар ва штабга айтилган сўзлар

Энг илиқ сўзларни у мухлисларга айтди ва уларни камдан-кам учрайдиган алоҳида тоифа деб атади. Каррик ўтиб бораётган йилнинг ёрқин дамларини эслади: ўшанда одамлар стадиондан яна қайтиш истаги билан кетишарди. Сўнги пайтда натижалар қувонтирмади (жамоа Премьер-лигада 18-ўринда турибди). Лекин унинг сўзларига кўра, трибуналардан фақат меҳр ва қўллаб-қувватлашни эшитди, ваҳоланки, юз ўғириш энг осони эди.

«Бу меҳр ҳеч қачон ўлмайди.»

Алоҳида у мураббийлар штабига садоқати ва машаққатли меҳнати учун миннатдорлик билдирди. Меҳнати кўпинча кўринмай қоладиган саҳна ортидаги ходимларга ва футболчиларга ҳам раҳмат айтди. Клубга фақат омад тилайди ва энди жамоани трибунадан туриб қўллаб-қувватлашга ваъда беради.

Кеча кечқурун Рио Фердинанд Каррикни ишдан бўшатиш қарорини кескин танқид қилган эди, мураббийнинг ўзи эса бирорта ҳам шикояциз кетди. Почеттино ўйинни тез йўлга қўйиши керак: «Манчестер Юнайтед» навбатдаги учрашувини 22-ноябр куни Тошкент вақти билан 21:30да Премьер-лигада «Ливерпул»га қарши ўтказади.