Нунес «Манчестер Сити»да яна уч мавсум қолиши мумкин

Португалия терма жамоаси футболчисининг амалдаги шартномаси 2028-йилгача амал қилади. Манчестер Эвенинг Невс ёзишича, клуб футболчига бозордаги қизиқишни кузатиб бормоқда ва уни Этиҳад стадионида олдиндан мустаҳкамлаб қўймоқчи.

Нашрнинг ёзишича, янги шартнома Нунеснинг маошини сезиларли оширади. Ҳафталик маош тахминан 180 минг еврогача кўпайиши керак — бу ҳозиргисидан 20 минг евродан ортиқ.

Португалиялик футболчи 2023-йилда «Вулверҳемптон»дан «Манчестер Сити»га кўчган. Шундан бери клубда 131 та ўйин ўйнаб, беш гол урган ва 25 та голли узатма берган. Англиягача 28 ёшли футболчи Португалияда «Эриссейренсе», «Эшторил» ва «Спортинг» сафида чиққан.

Клуб ҳам, футболчининг ўзи ҳам шартнома узайтирилгани ҳақида эълон қилмаган. Лекин «Манчестер Сити» ростдан ҳам ошиқаётган бўлса, демак, улар Нунесни захира вариант эмас, яқин йилларга мўлжалланган футболчи деб кўрмоқда.