Хусанов — Ситида энг кўп ўйнаганлар бешлигида

Энзо Мареска Манчестер Сити бош мураббийи лавозимида ишлаётганига уч ой бўлди. Бу вақт ичида у айрим футболчиларга бошқаларидан кўра кўпроқ таянди. Майдонда энг кўп вақт ўтказган футболчи дарвозабон Жанлуижи Доннарумма бўлди. Майдон футболчилари рўйхати эса қизиқроқ. Унда Абдуқодир Хусанов ҳам бор.

Бешликда кимлар бор

Рўйхатни Рубен Диас бошлаб турибди, ундан кейин вице-капитан Эрлинг Холанд келади. Иккаласининг ҳам жамоадаги ўрни аниқ. Кейинги ўринларда ярим ҳимоянинг муҳим бўғини Эллиот Андерсон ва Марк Геи бор. Бешинчи ўринда 22 ёшли Хусанов турибди. Яқинда у ўйнаган минутлари бўйича Ёшко Гвардиолни ортда қолдирди.

Асосий таркибдаги ўрни кафолатлангандек кўринмаса-да, Мареска уни ҳимоя чизиғининг турли нуқталарида қайта-қайта синаб кўрмоқда. Бу футболчининг универсаллигидан далолат беради. Клуб ёзда ўнг қанот ҳимоячиси сотиб олмаганининг сабабларидан бири ҳам шу эди. Хусанов Матеус Нунеснинг ўрнини боса олади, деб ҳисобланган. Мареска ўйинни уч марказий ҳимоячи билан қуришни яхши кўради, шунинг учун Хусанов ўнг томонда яна-да фойдали бўлиши мумкин эди.

Аммо энг яхши ўрни марказда

Мавсум бошидан бери ўнг қанот ҳимоячиси сифатида у ҳужумга қўшилганда ва рақиб ярмида тўп ишониб топширилганда бир неча бор иккиланиб қолди. Шанба куни Ноттингем Форестга қарши ўйинда марказга ўтгач эса анча хотиржам кўринди.

Алмаштиришлар борасида ҳам саволлар бор. Аввалига Маресканинг алмаштиришлари ўз ўрнига тушарди. Сўнги ўйинларда эса улар кўпроқ кечиккан тузатишларга ўхшаб қолди. Фақат танаффусларнинг ўзида 11 та алмаштириш қилинган. Уларнинг бир қисми жароҳатлар туфайли мажбурий эди, бироқ янги жуфтликлар ҳимояни мустаҳкамламади.

Марказда кўпроқ Геи ва Диасга ишонч билдирилди. Бироқ улар бирга асосий таркибда чиққан сўнги тўрт ўйиннинг учтасида улардан бири танаффусда алмаштирилди. Бундай вазиятда Хусанов ишончлироқ вариантдек кўринади.

Агар Нунес жароҳатлардан қоча олмаса, Хусанов ўнг томонда керак бўлади. Аммо мавсум боши унинг қаерда энг кўп фойда келтиришини кўрсатди. Ноттингем Форест билан ўйинда олган зарбадан тикланса, у марказда имконият олишга лойиқ. Манчестер Сити учун бу, эҳтимол, энг мақбул вариант.