Манчестер Сити 7 та ғалабадан сўнг кетма-кет 3 марта ютқазди

Аввал Астон Вилла меҳмонида 1:2, кейин ўз майдонида Брайтонга 0:1, шанба куни эса «Сити Граунд»да Ноттингем Форестга мағлубият. Маресканинг айтишича, учала ўйин ҳам бир-бирига ўхшамаган. Лекин уларни бир нарса бирлаштиради: ҳар бирида Манчестер Сити тўпни узоқроқ назорат қилган ва кўпроқ имконият яратган.

Рақамларга қаранг. Астон Вилла билан ўйинда тўп назорати 63 фоиз, имкониятлар 15:8. Брайтон билан 62 фоиз ва 21:7. Ноттингем Форест билан 79 фоиз ва 12:11. Жамоа «омадимиз келмади» дейишга ҳақли. Аммо Ноттингем Форестнинг ҳам ўз далили бор: улар бу учрашувга кутилган голлар (xG) жадвалида учинчи, ҳақиқий турнир жадвалида эса охиридан иккинчи ўринда туриб келган эди.

Муаммо ҳимояда

Марескани бошқа бир рақам хавотирга солиши керак. Манчестер Сити «Энфилд»даги ғалабадан бери, яъни тўққиз ўйиндан бери дарвозасини дахлсиз сақлай олмаяпти. Ундан олдин, Сандерлендга қарши ўйинда ҳам жамоа учта гол ўтказиб юборган эди. Сўнги саккиз учрашувда 17 та гол ўтказилди. Улардан учтасига, ҳеч бўлмаганда қисман, Жанлуижи Доннарумманинг хатолари сабаб бўлди, лекин гап фақат унда эмас.

Мареска ҳимоя чизиғини баланд ушлайди. Тўп бой берилдими, ҳимоячилар ортида бўш жой қолади ва жамоа ҳужумдан ҳимояга ўтишда заиф бўлиб қолади. Бу камчилик унинг жамоаларига аввалдан таниш. Лестер ва Челсида уни тўп билан ҳаддан ташқари эҳтиёткор ўйнашда айблашган, ҳимоя чизиги шунчалик баланд бўлганда буни тушунса бўлади. Шу боис унинг жамоалари учун яккама-якка курашлар жуда муҳим. Ноттингем Форест билан ўйиннинг биринчи бўлимида Манчестер Сити бу курашларда ютқазди ва Маресканинг хафа бўлгани яққол сезилди. Қаршисида эса бир йилдан ортиқ яхши ўйин кўрсатмаган Лиам Делап турарди. Ҳимоя ортида бундай бўшлиқ қолганда у айниқса хавфли.

Ярим ҳимоя: куч етишмаяптими?

Мареска Энзо Фернандесни жуда юқори баҳолайди: Манчестер Сити унинг учун Челсига 125 миллион фунт стерлинг (167,7 миллион доллар) тўлади. Аммо Премьер-лига ўлчовлари билан қараганда Фернандес унчалик бақувват футболчи эмас. У Кол Палмер билан бирга майдонга тушганида Челси баъзан жуда енгил жамоадек туюларди. Мареска аргентиналик футболчини майдонда кўришни шу қадар истардики, мураккаб ечимлар ўйлаб топарди. Масалан, Мало Густо ўнг қанот ҳимоячиси билан «10-рақам» ўртасидаги ғалати гибрид ролида ўйнаган.

Манчестер Ситида ҳам манзара ўхшаш. Раян Шерки жуда иқтидорли ҳужумкор ярим ҳимоячи, лекин ҳимояда унга таяниб бўлмайди: на позиция танлашда, на ортга қайтишга тайёрликда. Буни ўтган мавсумда Пеп Гвардиола ҳам тан олган эди. Агар унинг ортида икки ҳаракатчан ўйинчи турса, масалан, кўп югурадиган Эллиот Андерсон ва Родри даражасидаги бузғунчи, муаммо йўқ. Аммо Родри йўқ, Фернандес эса Андерсонга жуда катта жисмоний юк қолдиради. Андерсон ўз ўрнида бўлмай қолса, айтайлик, ҳимоячи хавфли ҳудудда тўпни бой берса, жамоа дарҳол очилиб қолади.

Энди нима бўлади

Маресканинг сўзларига кўра, бу мағлубиятдан кейин дарҳол навбатдаги ўйинга чиқмаслик яхшироқ бўлган камдан-кам ҳолатлардан бири. Танаффус давомида у ҳамма нарсани қайта кўриб чиқади. Энг оддий йўл Фернандес ва Шеркини бирга майдонга туширмаслик, бироқ ечим мураккаброқ бўлиши мумкин. Премьер-лига қайта бошланганида Манчестер Сити чемпионлик учун курашдан четда қолган бўлиши мумкин.

Бунинг фонида яна бир масала бор. Ўтган терма жамоалар танаффусида мустақил комиссия Манчестер Ситини Премьер-лига илгари сурган айбловларнинг биттасидан ташқари барчаси бўйича айбдор деб топганини эълон қилган эди. Жазо ҳали эълон қилинмаган, айрим кузатувчилар эса бу айнан шу танаффусда юз бериши мумкин, деб ҳисоблайди. Бу футболчиларга қандай таъсир қилаётганини ҳеч ким аниқ билмайди. Бироқ катта очко айирилиши хавфи остида ўйнаш ютқазилган яккама-якка курашлар ва интенсивлик пасайишига олиб келиши эҳтимолдан йироқ эмас.