Романо: «Манчестер Юнайтед» Каррикни ишдан бўшатди

Ишнинг шунга бораётгани ҳақида кеча кечқурун ёзган эдик. Ўшанда Каррик билан хайрлашиш қарори ҳақида илк хабарлар пайдо бўлганди. Бугун эрталаб эса Манчестер Эвенинг Невс раҳбарият тавсияси ҳақида хабар берганди. Энди Романо ишдан бўшатишни амалга ошган факт сифатида ёзмоқда. Клубнинг расмий баёнотини ҳозирча кутяпмиз.

Ҳаммаси қандай кечди

Манчестер Эвенинг Невс маълумотига кўра, ижрочи директор Омар Беррада ва спорт директори Жасон Уилкокс Каррикнинг мавсумни ўзгартира олишига душанба куниёқ ишонмай қолган. Бироқ ишдан бўшатиш ҳақидаги тавсияни клуб ҳаммулкдори сер Жим Ретклиффга тақдим этиш керак эди. Шу боис улар Монакога учиб боришга мажбур бўлишди. Учрашув кеча бўлиб ўтди, унда Глейзерлар ҳам қатнашди. Кечқурун Беррада ва Уилкокс Нитстса орқали қайтиб, соат 20:00 дан кейин Манчестерда эди.

Каррик Каррингтонга эрталаб соат 7:50 да етиб келди. Беррада ва Уилкокс ҳам базага келиши керак эди, чунки улар янгиликни шахсан айтишни талаб қилишган. Клуб унинг ўрнига одам қидираётган сўнги кунларда Каррик ҳали ҳам машғулотлар ўтказиб турди. Эслатиб ўтамиз, «Астон Вилла» билан 4:4 ҳисобидаги дурангдан сўнг жамоа танаффусга Аплда 18-ўринда, яъни қуйи лигага тушиш зонасида кетган эди.

Ўрнига ким келади

Ворис сифатида Маурисио Почеттинонинг номи тилга олинмоқда. Манчестер Эвенинг Невс хабарига кўра, «Манчестер Юнайтед» унинг кетиш шартларини келишиб олиш учун АҚШ Футбол федерацияси билан аллақачон боғланган. Айтилишича, 54 ёшли аргентиналик мутахассис билан шартноманинг шахсий шартлари келишиб олинган.

Почеттинонинг шартномасида 10 миллион долларлик (7,5 миллион фунт стерлинг) компенсация банди бор. Якуний сумма бундан ҳам ошиши мумкин, чунки у ўзи билан бир нечта ёрдамчисини олиб келмоқчи. Яна бир жиҳат бор: Почеттино ҳозирча АҚШ терма жамоасини бошқармоқда. У КОНКАКАФ Миллатлар лигасининг Гаити билан чорак финалида жамоа тепасида қоладими-йўқми, шу ҳақда музокаралар кетяпти. Бу босқич икки ўйиндан иборат: биринчиси шанба куни, иккинчиси чоршанба куни эрта тонгда бўлиб ўтади.

Кейин нима бўлади

«Манчестер Юнайтед»нинг навбатдаги ўйини 22-ноябрда бўлиб ўтади. Жамоа Премьер-лигада «Ливерпул»га меҳмонга боради, учрашув Тошкент вақти билан соат 21:30 да бошланади. Почеттино шу ўйингача жамоани расман қабул қилиб улгурадими, ҳозирча номаълум. Клуб баёнотини кузатиб борамиз.