Венгер FIFA президентлигига номзодини қўйиши мумкин

77 ёшли франсуз ҳозир Фифада жаҳон футболини ривожлантириш йўналишига раҳбарлик қилмоқда. ББК маълумотига кўра, уни UEFA қўллаб-қувватламоқда. Айнан UEFA Инфантинога қарши мухолифатнинг асосий кучига айланган. Фоот Меркато ёзишича, Венгер ҳали якуний қарорга келмаган. РМК Спорт эса жавоб яқин соатларда маълум бўлади, деб хабар бермоқда.

Нега айнан ҳозир

Сабаблардан бири барбод бўлган Fifa Форвард Энтерприсе лойиҳаси. Унга кўра, жаҳон чемпионатининг тижорий улушлари хусусий инвесторларга берилиши керак эди. Венгер бу ғоядан ўзини узоқ тутди ва баёнот билан чиқди. Лекин баъзи бошқа функсионерлар сингари Фифани тарк этмади. Ишини одатдагидек давом эттирди: Сюрихда FIFA Кенгаши йиғилишида қатнашди, яқинда эса Озарбайжонда 15 ёшгача футболчилар ўртасидаги жаҳон чемпионатида Инфантино ёнида бўлди.

РМК Спорт маълумотига кўра, Венгернинг FIFA билан шартномаси 2026-йил охирида тугайди, уни узайтириш имконияти ҳам бор. Бу эса унга яқин ҳафталарда сайловолди кампаниясини олиб боришга йўл очади.

Инфантино ҳамон фаворит

Лойиҳа атрофидаги жанжалга қарамай, амалдаги президент Африка, Осиё ва Жанубий Америкада мустаҳкам мавқеини сақлаб турибди. Яқинда Африканинг барча 54 федерацияси уни бир овоздан қўллаб-қувватлади. Бунга қадар Инфантино қитъани молиялаштиришни оширишга ваъда берган эди. РМК Спортнинг сўнги ҳисоб-китобларига кўра, 211 федерациядан 80 тадан 90 тагачаси Инфантинога овоз бериши мумкин.

Венгернинг ўзи бутун дунёда, айниқса Африкада машҳур. У ерда унинг Арсеналда қитъа футболчилари билан қилган ишини ва жаҳон чемпионатини 48 жамоагача кенгайтиришни қўллаб-қувватлаганини қадрлашади. Бироқ РМК Спорт таъкидлаганидек, кучлар нисбатини ўзгартириш осон бўлмайди.

Ёш ва муддатлар

Ёш масаласи ҳам савол туғдирмоқда: Венгер тўрт йиллик ваколат муддатини тўлиқ ишлаб бера оладими? Фоот Меркато маълумотига кўра, баъзи тарафдорлари у сайловда ғалаба қозониб, кейин муддатидан олдин кетиши мумкинлигини ҳам истисно этмаяпти. РМК Спорт эса бунга бошқача қарайди: 2031-йилги сайловни мўлжаллаётганлар учун Венгернинг ёши аксинча устунлик.

Тоттенҳемнинг собиқ ҳимоячиси Рамон Вега ва Япония футбол ассоциациясининг фахрий президенти Кодзо Тасима номзодларини аллақачон эълон қилган. РМК Спорт маълумотига кўра, агар Венгер охиригача бормаса, UEFA FIFA Кенгаши аъзоси ва Венгрия футбол федерацияси президенти Шандор Чанини қўллаб-қувватлашга ўтиши мумкин.

Кейин нима бўлади

Президентликка номзодлик аризаси 18-ноябргача қабул қилинади. Сайловнинг ўзи 18-март куни Рабатда (Марокаш) бўлиб ўтади. Венгер бу қадамга журъат этса, уни қизғин кампания кутади: Инфантино тарафдорларини фикридан қайтариш осон бўлмайди. Расмий эълон бўлмагунча бу фақат тахмин, холос.