Гаити Ақшга қарши «уй» ўйинини Маямида ўтказади

КОНКАКАФ Гаити терма жамоасининг сўровига ижобий жавоб берди. Миллатлар лигаси чорак финалининг биринчи ўйини 14-ноябр куни Маямида бўлиб ўтади. Аввал у Ямайканинг Кингстон шаҳрида ўтказилиши режалаштирилган эди. Конфедерацияда буни «ўйинларни ўтказишнинг махсус тартиби» деб аташди.

Гаити ўз уйида ўйнай олмайди

2021-йил июлидан бери Гаити терма жамоаси расмий уй ўйинларини ўз мамлакатида ўтказа олмаяпти. БМТ баҳосига кўра, пойтахт Порт-о-Пренснинг 90 фоизи, жумладан, миллий стадион ҳам қуролланган тўдалар назоратида. Шу сабаб жамоа 2026-йилги Жаҳон чемпионати саралашидаги «уй» ўйинларини Кюрасао, Аруба ва Барбадосда ўйнаган.

Миллатлар лигаси тақвими билан эса бошқача бўлиб чиқди: Кюрасао ва Ямайка худди шу оқшом ўз рақибларини қабул қилади. Гаитига Кингстондаги «Сабина-Парк» стадиони қолган эди. Ҳозир бу крикет майдони, 1962-йилгача эса бу ерда Ямайка терма жамоаси ўйнаган. Миллатлар лигаси саралашидаги икки ўйинда у ерга ўртача бор-йўғи 297 нафар томошабин келган.

Маями — Гаити учун қулай манзил

Ўйин рақиб ҳудудида бўлса-да, Гаити учун бундан яхшироқ жой топиш қийин. Ақшда гаитиликлар ва уларнинг авлодлари энг кўп яшайдиган шаҳар — Маями: бу ерда ярим миллионга яқин одам истиқомат қилади, асосан Флорида жанубида.

Жамоа Ну Стадиум аренасида ўйнайди. Июн ойида бу ерда стадионнинг илк халқаро ўртоқлик учрашуви бўлиб ўтган: Гаити Перу билан ўйнаган, трибуналар эса тўла эди — 26 700 нафар томошабин. Бу Кингстондагидан бир неча баравар кўп.

Бу асрда АҚШ ва Гаити олти марта учрашган: америкаликлар тўрт марта ғалаба қозонган, икки ўйин дуранг билан якунланган.

Гаити учун бу ёзги Жаҳон чемпионатидан кейинги илк АҚШ сафари бўлади. Жамоа 1974-йилдан бери илк бор жаҳон биринчилигида қатнашди ва гуруҳдаги учала ўйинда — Марокаш, Шотландия ва Бразилияга ютқазди. Бироқ Массачусетс, Филаделфия ва Атлантадаги ўйинларда мухлислар уни ажойиб қўллаб-қувватлаган эди.

Жавоб ўйини 17-ноябр куни Синсиннатидаги ТҚЛ Стадиум аренасида бўлиб ўтади. КОНКАКАФ маълум қилишича, Гаитидаги хавфсизлик билан бағлиқ мураккаб вазият сақланиб турар экан, бу тартиб амал қилади. Мамлакат терма жамоаси ва клублари рақиб ҳудудидаги ҳар бир ўйин учун КОНКАКАФ рухсатини олиши керак. Конфедерация, шунингдек, бу қарор исталган пайт ўзгартирилиши ёки бекор қилиниши мумкинлигини таъкидлади.